我唔認同有人話我哋輸在唔夠奸。
首先，場仗未完，呢刻就話輸嘅人，雖然出發點可能只係想提醒大家唔好鬆懈，要更努力奮戰，但我認為呢種表達方式無助提升士氣。
而且我哋作為被打壓、被殘害嘅一方，就算點樣還擊，都唔係「奸」。對方係怪物，所以我哋要變成怪物先可以打敗佢哋？我哋明明心存嘅係為自由、公義、人權而戰嘅正義之道，何需自貶為怪物？教訓怪物、消滅怪物，難道唔係英雄之為？
問題係在於有部分人對「正義」同「善良」理解不足。打不還手，係縱容對方繼續濫暴；嘗試以愛感化魔鬼，係愚蠢無知。
以武制暴，係正義。
對潛入我方嘅奸險小人給予教訓，係正義。
為受害者復仇，係正義。
我哋需要做嘅，係糾正某啲盲反武力嘅人對「正義」同「善良」嘅定義，而唔係用同正義、善良相反嘅詞語擺落自己度呀
如果你堅持話要以奸制奸，首先你就要學下對家啲語言偽術啦，佢哋係無論自己友幾瘋狂幾暴力，都會稱佢哋為正義之師㗎。
佢哋唔會事先講定「啲黑衫咁暴力，我哋要比佢哋更暴力！」先出嚟斬人
呢啲嘢梗係有人做完先spin㗎啦
奸嘅人永遠自稱正義，我哋真正正義嘅就話自己唔夠奸，係咪傻㗎。
如果要講我哋仲欠缺啲咩，主要就係好多人仍然欠缺覺悟
香港而家已經淪陷，連整連儂牆都會被斬，大家就要明白任何形式嘅反抗都有機會要付出沉重代價
既然係咁，我哋更加要有不惜一切代價去換取自由嘅決心，認清敵人係只想置你於死地，所以要摒棄一切天真嘅幻想，勇敢地全力奪回主權
Search